約踩車遇意外,親屬告車友賠償147萬!

相約踩單車,疏忽遇意外 話說近排內地車界有單新聞被談論得熱烘烘,一班為數8個車友喺內地踩車,其中53歲A君中途停低講電話墮後,之後遇到交通意外,被發現時已經頭破血流、奄奄一息,立刻召救護車。 救護車都仲未到,反而車友就神奇地中途攔截另一正趕往醫院的救護車,上面有另一搶救病人(亦係踩車受傷的)。另一救護車救護員落地睇睇,留低包點滴叫佢哋自己搞掂之後就離開,等到幾十分鐘之後,佢哋嘅救護車先至正式 “趕”到,但A君已經返魂無術,不幸逝世。 事件非常不幸,我哋亦希望死者能夠安息。7個車友事後亦三次協助A君家屬前往事故地點附近實際測試,騎友團體又多次集資費用,購置祭品,參與家中祭奠、追悼會、週祭、百日祭、週年祭等現場祭奠活動。 告上法庭 點知一年之後,7個車友竟然一齊收到律師信,A君家屬控告當地單車協會同7個車友未盡到妥善管理協調、安全防護義務,更未盡到必要嘅照顧及注意嘅義務,要求賠償147萬人民幣賠償! 呢件事被內地風雲單車網報道形容為北京騎行圈第一案,而家仲係審理當中,可能會對未來內地單車生態起重大改變。   我哋對A君家屬奉上深切慰問,性命安全最緊要!不過如果真係告入咗,以後約Friend踩車都係小心啲,除咗做足安全措施之外,可能仲要簽埋生死狀。。。 想知道多啲內容,可以入去: 資料來源 風雲單車網微訊公眾號。 相片來源:Bike Law